Valkebergse leedsjes

Vastelaoves-sjlagersj leve sóms neet langer es ein jaor, meh in Valkeberg beware veer versjillende "evergreens" (dat is pas sjoan Valkebergs!). Hièl dèks hoort me de vastelaovesvierdersj dan ouch zègke: "Veer zouwe die echte ouw karnavals-sjlagersj ins mótte gaon opsjrieve. Beware veur de kinger van oos kinger." Dae wunsj is noe vervöld. Wiel van der Heijden, dat is de man dae daoveur haet gezörg.

In ein book van 160 bladzijdes haet hae 159 "ouw leedsjes" verzameld. Neet allein de weurd meh ouch de melodie. Kómpleet met noatebalke. En 59 van die leedsjes zint karnavals-sjagersj. Wiel is 62 en in de VUT. Dat lètste mót ouch waal, andersj höbs te dao geinen tied veur. "Moeze in archieve en navraog bie väöl Valkebergersj," zoa besjrif hae in zien voorwoord 't werk, dat hae haet gedoon. Wiel zingk al jaore in 't mannekoar van Geulklank en dat sjteit garant veur deskundigheid en leefde veer Valkebergse leedsjes.

Veur leefhöbbersj van ouw Valkebergse sjlagersj is dit book ein oetkóms: noe kinne ze al die leedsjes op hun gemaak naoleze en zinge. De tekste zin allemaol (op éin woord nao) hièl sjoan in de Veldeke-sjpelling gezat en dat zuut good oet. Zeker veur de luuj die höbbe mètgemaak, wie de aafgeloupe zeve jaor door ein aantal Valkebergersj tege die sjpelling is aangesjtamp. Noe kint Wiel van der Heijden zien book gelökkig ouch boete Valkeberg presentere. Want ouch veur luuj boete de Geulsjtad is 't de meujte waerd. Dit book is veur edere leefhöbber van dialekleedsjes de meujte waerd. "Vallekebergse leedsjes en karnavalssjlagersj, beijein gezeumerd" door Wiel van de Heijden. '

Allein mer te koup in Valkeberg, bie de Readshop.
T 043 601 41 60

Jan Notten
20-12-2002