3 ieëreleje binnen Veldeke

Nuuj ieërelede van Veldeke Limburg.

(Jos Stassen)

De Algemein vergadering van 29 november 2007 haet oos Vereiniging weer ’n drietal nuuj ieërelede opgeleverd. V’r kooste dat natuurlik neet in oos leste nummer van oze nuutsbreef gaon mitdeile, want de oetreikinge mooste nog plaatsvènge.

Óm ieërlid te waere mos te, zoa sjteit in de interne reigelinge van oos besjtuur, ‘ne sjtaot van Deens höbbe bènne oos vereiniging, neet allein bènne diene eige krink, meh zeker ouch daoboete. Angesj gezag, doe mos höbbe laote zeen, dat-s te get veur de belange van de ganse vereiniging höbs gedaon, dat-s te dich höbs ingezat veur ’t behawt van oos dialekte, dat-s te besjtuurlik aan de waeg höbs getummerd en dat-s te daobie luuj höbs weite te insjpirere zich ouch in te zette veur ’t sjpraeke en blieve gebroeke van oos dialekte. En dat neet e paar jaor, meh toch hieël get langer.

De nuuj beneumde ieërlede zin alledrie sjrievers.

V’r sjtèlle ze aan uch veur in volgorde van de oetreiking van de Veldeke ieëresjpang:

COLLA BEMELMANS oet Nuth woort bie de presentatie van ’t jaorbook 2006, wo-aan haezelf ein biedraag haet geleverd, door de veurzitter van Veldeke Limburg, Lei Pennings, nao veure gehaold. Lei vertèlde aan de luuj die aanwezig waore en aan Colla, wat de verdeenste van ‘m waore gewaes in ‘ne reeks van väöl jaore. Colla, de sjriever van kèngerbeuk (De Voele Baer, euver de kaorewouf, ’n Aomzeik haet ouch ’n laever), mitwèrker aan ’t book Kènger, wichter poete, sjriever van de es ènnige oait gans oetverkochde bundel gedichte in de Reeks Veldeke Literair ónger de titel: Uëver-dènke, sjriever van ’t book Nuther kal is geine nötte kal. Veural in zien werk Uëver-dènke haet hae in versjeije gedichte ‘nen toan getróffe, dae getuug van ’n deep inzich in de waereld en in ’t dènkpetroan van de miensj. Meh ouch zien korte verhaole en veurdrachte mochte en maoge d’r zin. Humor, melancholie, deepgank. Kort gezag: ’t werk van ‘ne dènker. En es hae die dan veurdreug mit zien dónker sjtöm en zien (dèks ondeugende) flikkerende ouge, veuls te wie hae zelf de verhaole belaef en doormaak.

Colla waor lid van de redactie van ’t Veldeke-tiedsjrif dat tot èndj 2006 oetkaom. Hae leverde dao-in en dao-aan groate biedrages en óngersjteuning bènne de redactie.

Colla waor tot ’t naojaor van 2007 lid (de leste jaore zelfs veurzitter) van de jury van de jaorlikse Veldeke Literatuurpries. Zien amusante, werm, meh ouch verduveld kritische opmèrkinge richting sjrievers zulle ederein dae d’rbie waor nog lang in ’t gedechs bie blieve.

Es g’r noe meint dat Colla de häöm opgesjtaoke sjpang door de veurzitter mit ‘ne groate vreugdesjprunk in óntvangs haw genómme, höbt g’r ’t mis. Colla Bemelmans ging ’t Veldekebesjtuur flink aan de kleijer euver ’t doon sjtoppe van ’t tiedsjrif, euver ’t wegvalle van ’t platform veur de sjrievers, de Limburgse literatuur. Dat zin zake wo hae gaaroet neet blie mit is. Meh ’t ieërlidmaotsjap haet hae in dank aangenómme.

JEANNE ALSTERSJ – VAN DER HOR oet Venlo woort op 2 mieërt 2008 door veurzitter Lei Pennings veurzeen van ’t gouwe ieërlidlidmaotsjapsjpengske. Dat gebeurde in de jaorvergadering van de Krink Venlo.

Lei Pennings memoreerde dat Jeanne al vanaaf mieërt 1981, dus al 27 jaor lank, besjtuurslid is van de krink. Ze woort beneump geliek mit häöre man Toeën Alsters, dat krinkveurzitter woort.. Al e jaor later sjtóng Jeanne aan de weeg van ’t eige vereinigingsblaad “De Kroèdwis”, ’t blaad wo de krink terech gruëtsj op is en dat in 2007 ‘t 25-jaorig besjtaon moch belaeve. Neet allein sjtóng Jeanne aan de weeg van ’t blaad, nae, ze haet tot veur e paar jaor truk ’t veurzittersjap van de redactie geveurd. Ze is noe nog ummer redactielid.

Jeanne organiseerde lang de declamatiewedsjtrieje veur de basisjoale, ze wèrkde mit aan de kaesj en nujaorskaarte-actie van de krink, aan de organisatie van de Venlose uurkes (mit eders kieër ’n opkóms van zoa’n 250 luuj), de inveuring van de Veldeke-trofee in de Venlose en Bliërikse vastelaovesoptoch. Ze leidde de cursus “Euver Venloos gespraoke” aan de Volksuniversiteit.

Op sjriefgebied kaome oet häör pen de gedichtebundels: Dauwdröppelkes, Zitte op ’n euverdik terras. Ze wèrkde mit aan ’t Venloos sjpraekwoordebook: Wae zich euver ’t Venloos geneert, ’t Venloos Woordebook, ’t Goje niets van Marcus.

Nao d’n doad van häöre man Toeën deeg Jeanne e sjtepke truk, meh ze bleef waal euveral aktief in, en es häör get neet beveel, haw ze direk de pen klaor óm daomit de sjtried aan te gaon. Kiek mer in de nuutsbreef nómmer 5 van 2007., wo-in zie, krek wie Colla Bemelmans, kritiek haet op ’t besjtuur nao ’t beëindige van ’t tiedsjrif.

Op 26 mieërt, ónger de jaorvergadering van de krink Mestreech, waor Veldeke-veurzitter Lei Pennings present om ’t sjpenske, verbónge aan ’t ieërlidmaotsjap op te sjpange bie RITA BARTELS.

Rita Bartels is al hieël lang, vanaaf 1979, dus bekans dartig jaor, besjtuurslid van de groatste krink van oos Veldeke-familie, de krink Mestreech. Van die dartig jaor haet ze de lèste 15 jaor ’t secretariaat geveurd, de geheimsjriefster dus. Dat beteikent de verantwoordelikheid drage veur de belangriekste functie bènne ein vereiniging. De pos kump bie dich bènne, alle pos geit via dich oet, doe maaks de agenda’s veur vergaderinge, de versjlage daovan, hils de kóntakte mit de lede gaonde, kortweg: bie alles bès te es secretarès betrokke.

Rita Bartels vervölde dees neet lichte taak mit ein groate vanzelfsjpraekendheid en mit enorm väöl charme. Neet allein achter häöre bureau deeg ze dat, ouch bie alle aktiviteite van de krink waor en is ze aanwezig. Dat is ouch good mèrke. Ze kènt praktisch alle lede van de krènk (róntenóm de 600) bie naam en wèt ouch nog de geziechter bie die name te plaatse. Ein gave, die ze vanoet häör werk es ónderwiezeres óngetwiefeld haet euvergehawte. Trouwens, mit collega Rita belle waor ouch ummer e groat plezeer. Ieësj vraogde ze mit oprechte belangsjtèlling wie ’t mit dich is.. En dan kaom later altied ’t zinneke: “Iech zal ins eve in miene kallepin loere of dat meugelik is!” Kènnelik kènt Rita ouch door de telefoon kieke, want de ieësjte kieër mèrkde ze direk de vraogteikes in mie gezich, want ze lag oet: “Eine kallepin is ‘ne agenda, dat kump oet ’t Frans. Calepin beteikent dao notitiebeukske.”

Rita maakde zich sjterk óm de prachtige verhaole van besjtuurslid Pol Brounts te bundele en oet te gaeve. Rita organiseerde mit daezelfde Pol excursies door de sjtad Mestreech, wobie ze mènnige ras-Mestreechteneer sjtökskes sjtad lete zeen, wovan hae ’t besjtaon neet kènde. Rita maak zich noe sjterk óm alle kunstwerke in Mestreech te veurzeen van plaquettes. Ze begeleidde Pol Brounts es ‘r örges ’n sjpraekbeurt moos gaeve in de provins. Rita waor docente aan de Volksuniversiteit wo ze tal van luuj häör kènnis euver de taal en de cultuur van Mestreech haet biegebrach.

Rita Bartels haet lange tied enorm väöl gedaon veur ’t Mestreechs en veur ’t behawt van oos dialekte. Ze deit dat nog ummer, ouchal haet ze noe aafsjeid genómme van ’t secretariaat van de krink Mestreech.