Dialect in al zien sjoanheid” (02-02-2011)
Aester-Aovendj
Traditiegetroew hiltj Veldeke Krink Ech inne maondj januari ‘ne aovendj wo-op ‘t dialect in al zien sjoanheid oppe buun weurtj gebrach. Ouch dit jaor weurtj daobie – net wie de aafgeloupe drie jaor – in dit kader aan de leje aangebaoje óm same nao de bóntje aovendj van de Vastelaovesvereniging “de Aester” te gaon en waal op goonsdig 2 februari 2011 óm 19.00 oer in zaal Royal oppe Pejjerstraot in Ech. Dees vereniging organiseertj eder jaor ‘ne geweldig sjoane aovendj väör de seniore van Ech. En of g’r uch dao al bie raekentj of neet, maaktj neet oet: Veldeke leje zeen van herte welkom en zólle óngetwiefeldj ouch noe weer waardere op welke meneer de Limburgse taal in vastelaovesverbandj weurtj gebroektj. Dit jaor traeje dao ónger angere op: de Jónges vanne Zank, De Laatbleujers en Martijn Smeets oet Ech. En van dao boete: Frans Crooneberg en Bruno Majcherek en de buutteredners Gilbert Petit en Jan Geraedts.
Ómdet de vastelaovesvereniging väöl geldj en tied stoptj in ‘ne sjoane aovendj höbbe w’r al ’n paar jaor geleje beslaote óm es vereniging dao same haer te gaon. Daomit wille w’r ouch óngerstrepe det weer det, waat zie doon óm oos Limburgse tradities en oos eige taal in ieëre te haoje, enorm waardere. Allein gaon väöl van oos leje neet nao ‘ne dergelike aovendj, mer same blieke zie zich geweldig te ammusere. Daoróm weer same nao de Aester! ’T is waal gebaoje väöraaf op te gaeve. Det kèntj tót zaoterdig 22 januari bie oos bestuurslid Riet Bougie-Jeuken. De entree is vief euro väör leje en väö introducees 7 euro.Es g’r uch op tied opgaeftj weurtj gezörgdj väör ’n gereserveerdje plaats en krig g’r van Veldeke Krink Ech ouch nag ’n consumptie aangebaoje.
Vergaet dus neet óm uch op te gaeve väör de Bóntje Aovendj van de Aester van Ech op woonsdig 2 februari óm 19.11 oer in de zaal van Royal Theater oppe Pejjerstaot in Ech.
