Finale 3e jeugddeclamatiewedsjtried

D'r zulle zoeën 50 kinger mitdoon oet gans Limburg. Die kinger höbbe n.l de finales gewonne in hun kringe ( Veldeke Limburg is n.l.verdeilt in kringe) en doon noe mit in de provinciale finale. D'r is 'n verdeiling in 3 groepe te weite groep 3 - 4 van de basissjoeël, groep 5 - 6 van de basissjoeël en groep 7 - 8 van de basissjoeël. Van elke groep kump d'r dus oeteindelik 'ne provinciale kampioen. De pries zulle waere oetgereikt durch emes van de provincie - missjien 'ne vertegenwoordiger van depute Odile Wolfs - de vuurzitter van Veldeke Limburg d'n hieër Lei Pennings en de vuurzitter van de krink Zittert d'n hieër Jean Knoors.

De wesjtried waert gehoute in 't geboew van de mediagroep in Zittert aan de Mercatorweg en begint om 14.00 oer en zal doere tot ongeveer 18.00 want d'r zunt ongeveer 50 deilnummers.
De jurie waert gevormd durch:

- Colla Bemelmans oet Nuth;
- Pierre Backus (vuurzitter) oet Remunj;
- Anne Nooten oet Tegele
- Ton van de Wijngaard oorspronkelik oet Landgraaf;
- Hein Bovendeerd oet Zittert.

Het gehieël waert georganiseerd durch Piet Aben en de krink Ech en de krink Zittert is gasthieër omdat 't in Zittert gehouwte waert.
De presentatie is in heng van Harrie Bronnenberg dae de kinger op 'n rustige en ontsjpanne maneer durch 't programma zal veure.

D'r zeen 'n beperkt aantal plaatsje en dat beteikent dat es alle kinger hun vaders, moders en breurkes en zusterkes, opa's en oma's mitbringe de zaal waal 'ns vol koos zeen. Houwt dao estebleef rekening mit. Vol is n.l vol en d'r kinne dan echt gein minse mieë bie.!!!!
Höbt estebleef begrip vuur 't gegaeve dat de femilie van de kinger vuurrang mot höbbe en veug uch daonao. V'r zulle kieke wie de opkoms is en es 't nudig is zulle v'r misjien in de toekoms 'ne nog groeëtere zaal motte zeen te kriege.


Jan Leblanc
17-05-2006

Zuuch oach: Finale Dialekdeclamatie (priesoetreiking)