Finale Dialekdeclamatie

Alweer vuur de 3de kier

Alweer vuur de 3de kier woert de finale gehouwte van vuurdrachte in 't Limburgs. Dizze kier in 't geboew van de Media Groep (de gezèt) in Zittert. Zèk mer 50 kinger dege mit oet bouw gans Limburg. Allein die van Mestreech, Remung en Heële waore neet dao....

Nao de foto's van Finale Dialekdeclamatie (Foto Leon Smeets)

De gedichte woerte good gebrach doer de basissjoeëlkinger, klein döpkes van e jaor of 6 dies te al gauw e punt mieë zouws wille gaeve ómdat ze al zoeë good vertederend plat kinne kalle en kinger van 12 die qua oeterlik op Havo 2 zouwe kinne zitte. Daovuur waore ze in laeftiedsgroepe ingedeild.
De pries vole bie:

Groep 3 en 4 ( klas 1 en 2 van vreuger):

  • 1ste : Patty Kurvers oet Ech mit Zeve poeze
  • 2de : Lieke Seelen oet Venlo mit Visite
  • 3de : Sumintha Vijayakumar oet Tegele mit Ein kusje van mam.
Groep 5 en 6:
  • 1ste : Lauri Goossens oet Tegele mit Machinis van Hans Jacobs
  • 2de : Mirte Salden en Kathelijne Vosters oet Gelaen mit Póppeleid
  • 3de :Ylaise Huberts oet Tegele mit 1ste Kemunie van Leo de Ronde
Groep 7 en 8:
  • 1ste : Stacey Sorée oet Venlo mit De Koekoek van Hans Jacobs
  • 2de : Teun Loete oet Ech mit 't Verke van Har Ramakers
  • 3de : Miguelle Wetzels oet Kirkrao mit drie gedichte, ènt van häör zelf en twieë van W.Ploem


Alles woert prima aanein gekald doer de Zitterdenaer Harie Bronneberg, de pries woerte oetgedeild doer Mevr.Hanna Smeets van de provincie die hart vuur häör werk oetsjtraolde, doer Lei Pennings, de nuje vuurzitter van Veldeke, dae bie zien ieësjte officieel optrae 'n gów vuur de kinger begriepelike speech hool en Jean Knoors, de vuurzitter van krink Zittert, die es gasthieëre optraejend, mit organizeerde.

De jury besjtóng oet Anne Nooten, Pierre Bakkes, Hein Bovendeaard en Colla Bemelmans, sjoeën uëver de provincie verdeild. De jury lètde vuural op 't plezeer aan 't vuurdrage, 't gebroek van de sjtum, of 't ritmis waor of de accente good loge en op gebare en mimiek.

Alle kinger krege 'n oorkonde en e book (de volgende kier misjien e book in 't plat, Suske en wiske of zoeë), de prieswinnaers krege 'n brónze, zilvere of gouwe herinnering en 'n tesj (sjuus wie 't book gesjponsord doer de Media Groep) en de ieësjte twieë van elke groep maoge tv-sjterre waere bie de Kinjerkraom.

Vuur de organisatie teikende de krink Ech en de presentatie sjtong ónger leiding van Piet Aben woeë 't enthousiasme al jaore vanaaf sjprietst. In de pauzes sjpieëlde de Droomband oet Mestreech muziek dae de kinger good aansjprook, meh de volgende kier toch mer weer get in 't plat.

't Is óntroerend die kinger zoeë good plat te hure kalle, dat dónt die uëver 50 jaor nog dink ich dan. Wat heisjt de vraog: Haet 't plat nog toekomst? Misjien bliek dit nog waal belangrieker vuur 't plat es godwètwat vuur cursusse of manifestaties. Ze höbbe mich weer get d'r van gemaakt !

Nao de foto's van Finale Dialekdeclamatie (Foto Leon Smeets)

Colla Bemelmans, Nut
26-05-2006