Keuninklike Familie in de Remunjse Kapellerlaan

Aan de Kapellerlaan in Remunj lik ’t Hoes veur de Kunste, wo ouch Veldeke Limburg en de Raod veur ’t Limburgs hoes hawte. Op 25 april waor dao al óm 9 oer sjmörges ’n vergadering gepland, wo ouch Pierre Bakkes oet diezelfde sjtraot bie moos zin. Dus hae sjtiefelde röstig daohaer, meh zaog get luuj, die zeker neet bie de vergadering nuëdig waore. Noe is in ’n Hoes van de Kunste, wo väöl vereiniginge biejein kómme, zoaget gaaroet neet vraem, meh wie burgemeister van Beers ouch nog aan kaom zètte, vóng Pierre dat toch get oetzunjerliks.

G’r sjnapt ’t al. Pierre kreeg ein keuninklike óngersjeijing, vanwaege tal van aktiviteite die hae boete zien langer es 40-jaorig werk in ’t ónderwies haet gedaon. Veural es veurvechter van ’t behawt van oos dialekte. ‘ne Greep oet al die aktiviteite: De 1ste sjtreektaalfunctionaris in Limburg, vreuger veurzitter van de Veldeke krink Remunj, vreuger besjtuurslid van Veldeke Limburg, veurzitter van de Vereiniging veur Dialect- en Naamkunde, maker van e proofsjrif euver variatie en verangering in ’t Moferts dialek, lid van de commissie veur toekènning van de Peter Kempkens Literatuurpries, vreuger veurzitter van de Veldeke Literatuurpries, lid van de wèrkgroep Erkènning van ’t Limburgs es minderheidstaal, sjriever van lèsbeuk in ’t dialek veur basis- en vervolgónderwies. Kortweg: dé ambassadeur van de Limburgse sjtreektaal. Daonaeve is hae al 60 jaor aktief muzikant bie de famfaar van Mofert en noe bie die van OLV in ’t Zand van Remunj.

Pierre kreeg de verseersele es Ridder in de Orde van Oranje Nassau opgesjpank.

Krek op ’t moment dat Pierre get wol trukzègke, sjtapde burgemeister van Beers opnuuts nao veure en zag dat ‘r get vergaete haw. Wat waor dat? Haw de keuningin zich vergis?

Nae, de burgemeister vertèlde dat de vrouw van Pierre, Yvonne de Vries, zich al e paar kieëre haw beklaag dat zoa min vrouwluuj e lintje krege, meh, zoa zag ‘r, dit jaor kómme in Remunj 6 óngersjeijinge van de 10 bie vrouwluuj terech. En doe begós hae de luuj veur te hawte wat Yvonne veur de Vrouwebewaeging in Remunj allemaol –naeve häör werk in ’t onderwies – haet gedaon. Medeoprichster en besjtuurslid van de stg Remunjse Vrouweraod, ‘ne koepel van versjeije plaatselike vrouwe-organisaties. In 1977 betrokke bie de oprichting van Stg VrouwenTrefcentrum, vanaaf 1998 jurylid bie de toekènning van ‘ne pries veur luuj die zich inzètte veur de verbaetering van de positie van de vrouw. Ze is lid van de emancipatieraod Remunj, ze is besjtuurslid en veurzitter van de famfaar OLV in ’t Zand.

Meh ouch bie Veldeke bleus Yvonne häör partie dik mit. Vanaaf 2004 is ze lid van ’t hoofbesjtuur, sjpeciaal belas mit alles wat mit volkskunde en volkscultuur te make haet. Ze is de aanjager van ’t lèsbeukske euver Sintermerte, ze is ummer aanwezig es get te doon is róntenóm volkskunde, lid van ’t landelik orgaan veur volkscultuur ’t IVOS.

Yvonne en Pierre wiste neet wat ze hoorte wie de burgemeister zag dat Yvonne waor beneump tot Lid in de Orde van Oranje Nassau. De veer kènger van dit koppel hawwe hie gein raekening mit gehawte, wiste neet van wae ze noe ’n foto móste make, wae ze blome móste gaeve. Ze höbbe same mer sjmörges taege tieën oer al de champagne ingesjöd en zich allemaol eine gedrónke op dit keuninklik echtpaar.

Jos Stassen.