Limburgwaek in de Limburgse Bibliotheke van 12 -21 januari 2007

Aan:
Besture van de Veldeke Kringe in Nederlands Limburg
Leje van de Algemein Vergadering van Veldeke Limburg
Bestuursleje van Veldeke Limburg
Leje Commissie Educatie van Veldeke Limburg

Remunj, 5 december 2006.

Leef luuj,

Limburgwaek (www.limburgweek.nl) in de Limburgse Bibliotheke van 12 -21 januari 2007.

De Limburgse bibliotheke halde van 12 wies 21 januari 'n Limburgwaek. Veldeke is gevraog aan dit projek metwerking te gaeve. 't Houfbestuur vindt dit 'n hiel gooj zaak umdet in 't biezónder oos Kringe heejmei 'n unieke kans kriege um zichzelf en ouk de Limburgse taal en volkscultuur veur 'n breid publiek te etalere. 't Bibliotheekhoes Limburg haet de planne oetgewerk in euverleg met oos Commissie Educatie.

Veldeke Limburg haet as zien beejdraag aan dit projek 't póppetheaterstök "Sjraarke en 't mergellandsjaop" ingebrach (zuuch oach "Limburgweek: boekingen poppentheater") en haop daomei te bereike det dees produktie alves eine kier in alle Veldekekringe gespeuld zal waere en daonao in gooj samewerking tösse oos Kringe en de lokale bibliotheke vaerdere verspreiïng vindt. Netuurlik haope weej det geej as Kringe ouk nog zelf 'n aantal opveuringe regelt, beej veurbeeld veur de kinder en kleinkinder van óg leje, of in schoeële, zoeëas det al met sukses in Ech en Valkeberg is gebeurd. De gegaeves nuuedig um 'n opveuring te regele zien óch al innige tied geleje door de Commissie Educatie via de e-pos toegesteurd.

As Kringe kint geej óg eige minse in de bibliotheekwaek aan bod laote kómme beej veurbeeld door kinder te laote declamere, óg schrievers en vertellers te vraoge veurdrachte te verzörge, de minse van de bibliotheke in ógge Krink te helpe de juuste minse te vinde. Geej kint ouk foldertjes euver óchzelf, óg beukskes en óg activiteitekalenders in de bibliotheke te legge.

Weej zeen in de samewerking met de bibliotheke 'n gooj meugelikheid dreej van oos strategische doelstellinge 'n ierste invölling te gaeve:

• 't werk van Veldeke te presentere aan 'n groeëter publiek;
• mier samewerking met andere Limburgse organisaties op te bouwe;
• de Limburgse schoeëljeug en eur elders te bereike.

Weej steure óg 't ganse Programma van de Limburgwaek euver de e-pos maar doon beej deze breef alves kopieë van inkele wiechtige euverzichte doa-oet.

Weej raekene op óch! Laot dees kans neet schete.

Veldeke Limburg
5-12-2006