Miene palmebessem
De zjwanezank van de Remunjse dichter Pierre Vrancken
Och, wie lang is 't al geleje
det ich mit miene palmebessem droog,
wo ich 't leefs die ingesjneurde viege
in sjlingers róndj-dróm hange zoog.
Wie gaer zól me zich noe ins zeen loupe
oet d'n tied zón fieftig jäörkes trök
mit ziene sjone palmebessem
en ei gezich vol kienjerlik gelök.
De grote sjtolsen haan sjtóng gans parmantig
helemaol baove in d'n toep.
Waat is t'r mich dök ómgesjlage
bie 't aaftratsje vannen hoge sjtoep!
Op eine sjtek golje appelesiene,
sókkere en sjokolate eikes in 't róndj'
't Waas einen toer óm draaf te blieve:
't water sjtóng dich in de móndj!
Geer mót häör morge ins zeen loupe
mit gezichter sjtraolend en cóntent,
Doot häör ouch get in 't böske:
ei kwartje, ein döbbeltje, maar … geine cent!
Pierre Vrancken
Remunjs
Dit gedich is de zjwanezank gewaes van de Remunjse dichter Pierre Vrancken.
Op de morge van ziene sjterfdaag, op 28 meert 1953, sjtóng 't in De Maas- en Roerbode.
11-2-2006
Paosje: