Poppetheater

Ich koos weer kinjd tusse de kinger zeen !!! Wat 'n geveul!!.

Tusse 'ne groeëte groep kinger van de basissjoeël De Violier in Ech zote 'n sjtel volwassene, die same mit die kinger de première biewoeënde van 'n vuursjtelling van 't poppetheater Piepmoes. Dit poppetheater sjpielde 't dialeksjtuk: "Sjraarke en 't Mergellandsjaop".

Mevrouw Tekstra wis mit de prachtige - euveriges zelfgemakde - poppe de kinger op 'n ongeluifelike meneer 't sjpel mit te laote belaeve. Zieëker wie de heks van de Kolleberg 't wachwoord vuur de toegank tot de sjatkis mit de bloodkorale, dae versjtopt waor in de grotte in Valkeberg, probeerde te pakke te kriege. "t Plotselinge te vuursjien komme van 'ne groeëte vleermoes bracht 't ganse sjpul an 't gille.

Mè ich mot oetsjeije want angers verklap ich te väöl.

Vuur mich waor 't 'n ganse belaeving om weer ins tusje kinger te zitte die gans op gaon in 't poppekassjpieël zoe es vier dat vreuger neumde.

Ich zeen ze nog vuur mich, boksend taege de belagers van Sjraarke. Ze mooste zoeë aaf en toe zelfs tot 'n bietje kalmte gemaand waere.

Ich zègk uch 't woar vuur mich 'n ganse belaevenis.

Waorum waor ich als "aoje" miens noe nao 't poppekas gaon kieke, dat deis te toch neet! Es 'ne opa tussje al die klein kinger.

Dat ich dao waor how natuurlik zien raeje. 't Besjtuur van de krink Ech van Veldeke how vuur de première van 't poppetheater in de basissjoel De Violier gezörgd. 'n Oetveuring die durch 't hoofdbesjtuur van Veldeke Limburg is opgezat om al zoeë vreug meugelik de kinger van de basissjoele mit 't dialek bekind te make en om ze te laote begriepe dat hun moderstaal 'n deil is van de cultuur woe-in ze opgruje. 'n Poging ouch om get te doeën aan 't gegaeve dat oos kinger sjtraks nog neet mieë weite dat 't dialek ouch 'n taal is die zonger gestraoft te waere gesjpraoke kan waere. 'n Poging om 't dialek laevendig te hawte en d'r vuur te zörge dat 't dialek van generatie op generatie durchgegaeve waert.

Ich mot mevrouw Tekstra mien complemente make vuur 't sjpannende verhaol,de ontzettend sjoene poppe, 't geweldige (ouch durch häör zelf gemakde) decor en de meneer wie ze 't sjpel op 'n toch vuur de kinger van Ech versjtaonbare wies wit te bringen. Mevrouw Tekstra sjprik van hoes oet Valkebergs dialek en mot zoeë noe en dan improvisere, mè ich höb d'r 't volste vertroewe in dat ze dat in alle dialekte tot 'n good eind wit te bringe. Complemente!!!

Complemente ouch aan Veldeke Limburg mit dit geweldige project en de meneer om kinger op 'n zoeë vreug meugelik tiedsjtip mit oos dierbare taal in aanraking te bringe.

Minse die mieë wille weite euver dit poppetheater of 't vuur hun sjoel of krink wille reservere kinne contact opnumme mit Ria Corstjens van Het Huis van de Kunsten in Remunj, T 0475 - 39 92 99.

Overzicht boekingen

Jan Leblanc
29-11-2006