Prissentatie versjesbunjel! (23-06-2010)
Door ‘n stroumstuuering kós d’n óngerstaondje aovendj op 19 mei 2010 neet doorgaon. Det geit aevel alsnog gebäöre en waal op woonsdig 23 juni 2010. Tied en programma blieve ‘tzelfdje! |
Prissentatie versjesbunjel
op jaorlikse Väördrachte-aovendj
Op goonsdig 19 mei 2010 weurtj de jaorlikse aovendj mit väördrachte gehaoje in de recreatiezaal van ’t Zorgcentrum “De Eghte” in Ech. ’t Programma is dit jaor waal hieël bezunjer. Ónger angere door de biedrage van de jubilerendje (jeugd)fanfare oet Pej en de prissentatie van ‘ne nuje versjesbundel van oud-Echtenieër Sef van Wegberg.
Zoa es gewuuenlik waere op deze aovendj ’n aantal väördrachte gehaoje. Det is allerieës vanne jeugdige wènnieërs van de Echter finale van de declamatiewedstried väör de basissjoaljeugd. Aansloetendj speeltj de Jeugdfanfare van fanfare St. Joseph Pej, die dit jaor 100 jaor bestuitj.
Nao ’n korte pauze gaon w’r verder mit väördrachte: deilnummers aan de cursus “Laeze en sjrieve in ’t dialect” drage ’n stökske väör. Dit is hun z.g. “meisterstök” es aafsloeting vanne cursus. Zie kriege vervolges van de väörzitter van Veldeke Limburg het certifikaat oetgereiktj det huuertj bie dae cursus.
Lèste óngerdeil van d’n aovendj is de bookpresentatie van Sef van Wegberg. ’t Betruf de veerdje versjesbunjel van zien handj, mer de ieëste in ’t plat. Sef van Wegberg is gebeurtig oet Pej, greuidje op oppe Houtstraot, wo zien aojers – later zien zöster – ‘ne sigarehanjel en drogisterie hawwe. Hae trouwdje mit Els van Montfort oet Ech. Zie höbbe daonao in Aruba en ’t noorden van ’t landj gewirktj en gewoondj, de lèste jaore in Eindhoven. Naodet Sef in 1988 ’n hertinfarct haw gekrege en ’t röstiger aan mós gaon doon, is hae versjes gaon sjrieve. Väör d’n nuje bunjel – wie gezag in ’t dialect – haef hae de hulp ingerope van Veldeke Krink Ech, wovan d’r lid is. Titel is: “Aan de kirk van Pej”. Op deze väördrachte-aovendj zal Sef van Wegberg zelf väörlaeze oet ziene bunjel. Deze is daonao te koup väör 10 euro inne bookhanjel. Mer allein op deze aovendj, bie de prissentatie op 19 mei, kóntj g’r ‘m kriege väör 5 euro! Mesjiens toch leuk óm te höbbe.
Ederein is welkóm en de toegank is gratis. ’t Begintj óm 19.00 oer en doertj tót ongevieër half tieën.
’t Volgendje gedichske is van Sef van Wegberg:
Muzikale nonne
Zöster Theresia tokkeldje de lier
mit äövergave en mit zwier.
Zöster Agatha, get minder muzikaal,
sloog mit äövertuging de cimbaal.
Moder äöverste beglèdje ’t stel
mit fienzinnig blokfluitspel.
Dit alles woor t’r ieëre van den Hieër
dae mit gekrómdje tene dach:
Stoptj estebleef en baetj get mieër!