Sinterklaos

Zinge veur Sinterklaos!

Sinterklaos ies e kingerfiès, woabie 't same zinge veur dae goje heilige man 'n groate rol sjpeelt. Neve de traditioneel leedsjes zoa-es: Zie ginds komt de stoomboot; Oh kom er eens kijken; Dag Sinterklaasje; Sinterklaas kapoentje; Zie de maan schijnt door de bomen, begint 't de lètste jaore, gelökkig, gans gewoon te were um ouch in de eige umgankstaal te zinge. Sinterklaos ies veur e kind 'n emotioneel ervaring. Wat ies dan beter es ziech dan zingentaere ute in de eige emotioneel taal, 't plat? Of dat noe op sjoal gebeurt, op de club of thoes, dat kump toch miè oet 't hart. Speciaal veur al die papa's, mama's, opa's, oma's, juffe en meistersj zint hie de tekste van twiè hièl bekènde leedsjes in 't dialek. Um gezellig same te zinge:

Zjwarte Piet dae ging fietse
(melodie: Zie ginds komt de stoomboot)

Zjwarte Piet dae ging fietse
toen knapde ziene band,
toen moes 'r goon loupe
mèt de fiets aan de hand
Hae kaom in e dörpke
en zag tege de sjmeed:
iech geluif dat in miene achterband
'n peperneutsje ziet.

De sjmeed moos toen lache
en plekde de band.
Toen koes Piet wir fietse
door gans Nederland.
Aoh jónges en maedsjes
lèt noe toch ins op.
Mesjiens zuus se Piet waal fietse
mèt Sint achterop!

Sinterklaos dae haet gezag

Sinterklaos, dat haet gezag,
veer maoge sjpele, veer maoge sjpele.
Sinterklaos dae haet gezag,
veer maoge sjpele de gansen daag.

refrein: (mèt de heng langs ein klappe)
krik krak sjiemela sjiemela sjiemela,
krik krak sjiemela sjie – me - laa

Els Diederen