Väörbereidinge vanne declamatiewedstrieje begós (15/20 april 2011)
Dit jaor ieës väör Ech en ómstreke (sjoale in Ech, St. Joas, Pej, de Boesj, de Deelgaard, de Slek, mer dus ouch väör kènjer oet Berkelieër, Gebrook, ’t Hènge, enz.), daonao graot Zöstere (dus Zöstere zelf, Deetere, Roostere en de Nuujstadt). In Ech väör de tieënde kieër!
Bönnekort óntvange alle basissjoale de oetnuuediging en ’t materiaal óm mit te doon. Det wil zègke det ze de kénjer kènne aanspaore óm mit te doon en hun ’n gedich laote oetzeuke oet ‘t door Veldeke Krink Ech aangeleverdje beukske mit gedichte. ’T oefene doon ze eventueel zelf of mit hulp van thoes. Sommige sjoale keze d’r väör óm op sjoal ’n väörrunj te haoje óm oet te make waem ane wedstried moog mit doon. Es ’n sjoal d’r väör keusj óm neet es sjoal mit te doon (ómdet ze bv. mit anger dènger bezig zeen in daen tied), kènne aojers altied zelf ’t initiatief numme es hun kèndj gaer mit zoe doon.
Want de kènjer zeen d’r äöver ’t algemein gaer mit bezig. Sommige make zelfs zelf hun gedich. Pap, mam, opa of oma helpe dao soms bie en det moog natuurlik. Väördrage motte ze toch zelf doon…
Es se ze soms bezig zuus…
Kènjer die al eerder höbbe mitgedaon, kieke d’r nao oet, höbbe d’r spas aan en gaon d’r hieël intensief mit aan de gang.
Wo mót dit haer?
Nou, simpel:
- oos streektaal weurtj good ónger henj genómme.
- veutje väör veutje zelf perbere get te sjrieve.
- later mitdoon aan cabaret, toneelspel, bóntje aovendje, revue of gank zoa mer door…
Kómtj die artieste inne dop straks beloestere en bekieke!
Väör Groat Ech: de 10e kieër op vriedig 15 april in de Pejjerhaof, Houtstraot Pej, vanaaf 19.00 oer.
Väör Groat Zöstere: de 4e kieër op woonsdig 20 april in de Hermeniezaal in Zöstere, vanaaf 19.00 oer.
Foto's gaeve 'n beeldj vanne Declamatiewedstried 2010 in Zöstere:
