Jaorvergadering! (24-02-2010)
AANGEKLÈDJE JAORVERGADERING
Op woonsdig 24 februari, is de jaorvergadering van Kring Echt van Veldeke. Det is óm mieë raeje ein aangeklèdje vergadering. Van d’n eine kantj omdet ’t bestuur de leje zal verwelkomme mit kóffie en vlaai. Van d’n angere kantj ómdet ’t programma get mieë inhultj den de gewuuenlike puntje van ’n vergadering.
Die zeen d’r ouch, zoa es g’r op de óngestaondje agenda kèntj zeen:
1. Welkom.
2. Verslaag vanne jaorvergadering 18 februari 2009.
3. Jaorverslaag 2009.
4. Financieel verslaag 2009.
5. Verslaag vanne kascontrolecommissie.
6. Beneuming nuuj lid kascontrolecommissie.
7. (Her)beneuming bestuurslid.
8. Aanpassing contributie.
Hienao ’n optraeje van Frits Klökske, vertèlselkesväördrager (mieë äöver Frits Klökske kèntj g’r hie ónger laeze)
Aansloetendj: pauze
9. Speerpuntje bestuur, van väörig jaor en van dit jaor.
10. Róndjvraog.
11. Sloeting.
Nog ’n optraeje van Frits Klökske.
Es aanvölling op ’t jaorverslaag weurtj dees vergadering ómliesj mit ’n presentatie van foto’s van activiteite, mit name van ‘t jaorliks oetstepke, dees kieër nao ’t Limburgs mien-verleje.
ÄÖVER VERTÈLSELKESZENGER FRITS KLÖKSKE
De man dae noe optreutj es de vertèlselkeszenger Frits Klökske waert gebaore op 22 juli 1949 inne Nassausjtraot in Remunj, in de sjlaopkamer baove gank, keulcel en e sjtökske sjlechterswinkel, ónger de naam Frits Roumen.
In september 1952 geit hae al – vanwaege de drökde in de sjlechterie – nao de bewaarsjool. De eerste drie jaor geneet hae óngerwies van zuster Domitia. Drie jaor lank krieg hae van häör ouch de ruumte óm zich oet te laeve mit wäörd en zank. Gein wónjer det hae bie de Eerste H. Kemunie in de tweede klas van de legere sjool e gedichske moog veurlaeze in de H. Hartkirk, ónger ’t toezeend oug van pesjtoor Schoolmeesters.
E jaor later waert hae toegelaote toet ’t jóngeskoor van Sjaak Zilvertand, van waem hae ouch pianoles haet. Ziene eerste solo as sopraan: Als ik een klokje was.
Remunj zaet hae vaarwel in september 1960: eers nao Weert, daonao nao Rolduc op internaat. Op det klein-seminarie maak hae actief kinnes mit toneel, harmenie, bóntje aovende, cabaret, plaetjes aaneinkalle, Gregoriaans, declamatie en neum maar ‘m kunsvorm op. Nao het gym haet hae in de vraemde Nederlands gesjtudeerd en in Postert, Boxtel en Tilburg lesgegaeve. In Tilburg rich hae ‘t “Incidissidentencabaret” van lerare Nederlands op, sjrief d’r tekste en leedjes veur.
Daonaeve zink hae in Udenhout in e kamerkoor, ’n folkgroep en vanaaf 1982 toet de daag van vandaag in eine Braobanse volksmeziekgroep.
As hae in 2003 trökverhoes nao Limburg, geit hae direk aan de sjlaag mit ’t opzitte van Remunsj repertoire óm ouch in Limburg te kinne optraeje mit leedjes en vertèlselkes äöver de jaore vieftig van de veurige eew. Frits Klökske is vanaaf det ougenblik ziene artiest(iek)enaam.
(In Remunjs plat)
Mien Waereldsjtraot
Mien sjtraot wo ich greujde, ederein zich bemeujde
mit alles waat ’t laeve kleurt,
die is gans verdwene, de sjtoumwalse versjene,
och, waat höb ich det toch betreurd.
Mit sjpelende kienjer waas de sjtraot e sjtök bliejer,
de opa’s op ‘ne keukesjtool,
de buim veur ’t tikkerke, in de ziesjtraot naopikkerke,
twee jes ware zat veur ’n gool.
De grootelders woonde bie de kienjer in hoes,
det waas algemein nog tradietie:
de oma die kaokde op ’t kaolefernuus
en de opa, dae sjpeelde veur pliesie.
’t Laeve, det waerde gelaef op de sjtraot,
want tv haai d’r destieds nog nemes;
doe kós ederein oet de buurt bie de naam,
zo waas ederein nog ech emes.
De mèlkboer kwaam edere daag mit de ker
en kreeg veur zie paerd aerpelsjale.
Waas ’t waekgeldj weer ins angers besjtaejd,
dan móchs se gerös later betale.
De kaole die sjuufde in ’t leeg kaolegaat,
in mien sjtraot kós se vès en vleis koupe,
doe kreegs d’r ouch greunte, ’t brood en get sjlók:
veur alle waar woor de waereld te beloupe.