paosjeier

Paosjeier verve

Oet oma’s tied.

Op Paosjzaoterdig kaome de klokke um 12 oer truuk oet Roame en brachte geverfde eier mèt. Gein sjoekkelade- of sjloekeier, allein geverfde hinne-eier! Ze woorte in de tuin versjtop en de kinger mochte ze gaon zeuke zoa gauw es de klokke loewde. De kinger vónge de eier dus op Paosjzaoterdig en neet op Paosjzöndig wie dat noe gebeurt.

Op zaoterdig veur de Paosje waor de fièrtigdaagse vaste aafgeloupe. De vastetrummelkes, woa in me de ganse vaste alle sjloek in bewaard hou, mochte noe ge-eupend waere. En me moch de eier zeuke en mèt de ièrsjte eier titsje.

’t Verve van eier.
Gebruuk
allein witte eier
azien
sjpekzjwaasj (zwoerd) of olie
kleursjtoffe:

Veur roaj eier: ’t water van roa krote (rode bieten)
veur greun eier: sjpinaziewater
veur paarse eier:  ’t kaokwater van road moos (rode kool)
veur gael eier: broen unnesjille (bruine uienschillen)
veur gael eier: saffraan (te koup in delicatessewinkelsj)
veur broen eier: koffiedrap

Naogelang ’t gewunsjde kleurbad:
kaok ’t greuntewater ièrsj get in zoadat ’t geconcentreerd is. Of kaok saffraandräödsjes, of unnesjille in water.

Maak de eier zuver. Gebruuk gein eier woa al e bersjke inzit. Wesj de eier sjoan mèt azien. Bring ’t kleurwater aan de kaok en kaok dao de eier 10 minute in.
De eier moete ónder water sjtaon. Laot de eier aafkeule en vrief ze in mèt sjpekzjwaasj. Of in plaats daovan mèt e lepke vol olie sjoan laote glanze.

Eiere titsje of köppe.

Ederien dae aan taofel zit keus ‘n ei. Hout ’t zoa sjtevig meugelik vas. Mèt z’n twièje waere noe de eier tegenein getitsj (of geköp). De verlezer (woavan ’t ei kapot is gegange) maog zien ei al opaete. De winnaer geit door met ‘ne ander tegesjtender. Op ’t ing blif eine winnaer euver.

Versjke:

Ein ei is gein ei
twiè eier is ’n hauf ei
drie eier is e paosjei!

Dao zint zelfs versjkes woabie se 4 eier moes aete um ein paosjei te hobbe’.

_{Netty Engels}

_{Dialekteks (Valkebergs) Els Diederen)}