Wieërtlands spraekwoeërdeboek

Wieërtlands spraekwoeërdebook: Schoeën gezagdj!

Vör de wêrkgroep kwoom d’r geîn indj aan. Dik óngerhâlf jaor gelieëje begoste ze mét de inventarisatie van spraekwuuërd en uutdrökkinge mét as basis ’t bukske Naame en Gezagdjes uut 1981. Opzét waas um alle spraekwuuërd in ‘nen hantieërbare vôrm uut te kunne gaeve en det hebbe ze gewieëte. Van alle kânte kwoom d’r now materiaol beej en toen woor ’t de kûnst um oeëverâl de gooj beteîkenis van te beschriêve. Nao waek op waek beejeîn te zeen gekaome, zagte ze begîn dit jaor: dit ésj, ve zeuke neet wieter. Per spraekwoeërd woeërt bekieëke waat de kernwoeërd wore en dao op in ein of mieër rubrieke ingedeildj, bv. Eur oûge zeen groeëter as eure boek (Je hebt meer opgeschept dan je op kunt) inne rubriek ‘oûge’ en inne rubriek ‘boêk’, enz., enz.


De volgendje ronde waas um te kieke of de gooj spelling konsekwênt aangehaoje waas. Det alles leverdje e fors book op van 250 pagina’s.

  

Âl met âl kwome zoondig 7 juni alle lienkes beejeîn um mét e fieëstelik programma d’n duîp te doon. ‘ne Bomvolle zaal amezieërdje zich mét de inleiding van Pierre Bakkes dae op ’n spuuëlse meneer, same met ’t publiek, wat bezûndjerhede van oeës dialekte helder maakdje. Hae waas erg complimenteus oeëver de opzét van ’t now book.

 

As aafwisseling kwome e paar wichter, di-j as béste uut de Declamatiewédstriêd wore gekaome, eur gedicht vuuërdrage.

 

Sikkertaris Jan Moonen haaj e verhaol ineîngezatte uut ’t alledaagse laeve van vreuger en noow, woeë hieël völ uutdrökkinge in verwêrktj wore: Van duîpsel tot doeëd. Det sloog good aan, zjuust wi-j de muzikaal optraejes van Fons Heuvelmans uut Rooj. ’n Prachtige stum en schoeën lidjes. Zoeë veel ’t umliêstendj programma bezûndjer inne smaak.

 

Mer ‘t ging um ’t hoeëgtepûnt van dieëze middig; de officieel prizzentatie van ’t now spraekwoeërdebook det de towpasselike titel ‘Schoeën gezagdj!’ haaj gekrieëge. Vuuërzitter Jan Feijen vertéldje in groeëte liêne wat oeëver de vuuërbereî-jingstiêd mét ’n gruuëtse stum van: wachtj mer ’s waat ich uch dalik laot kieke! Wéthaojer Harry Coolen krieëg toen de ieër um as ieërste ‘t book in hang te hebbe.

 

In zien dânkwoeërd haaj hae alle lof vör de aanpak van dit enorm karwej. ’t Rizzeltaot moog mét recht e waerdevôl book geneumdj waere det ouch vör minse boete ’t Wieërter lând mieër as de mote waerd és. Ânger prezêntbeuk gînge nao Pierre Bakkes, streektaalfunctionaris Ton van de Wijngaard, hoeëfdbestuurslid Maurits Geerts en uteraard de lede vanne wêrkgroep.

  

Vör ge-interessieërdje és ’t book te koûp inne bookhândels in Wieërt en Ni-jwieërt, Antiquariaat Theo Boom in Remundj en via Veldeke krînk Wieërt (tillefoon 0495-537790, e-mail: j_moonen@hetnet.nl).

  

En de priês vör zoeë ’n umvangriêk book véltj mej: € 22,50, exclusief verzendköste.